កាតា៖ ដំណើរនៃការប្រកួតពានរង្វាន់ FIFA World Cup បានឈានដល់វគ្គ ៨ក្រុមចុងក្រោយហើយនៅរាត្រីនេះ ខណៈក្រុមជម្រើសជាតិចំនួន ៤ នឹងត្រូវប្រជែងកៅអីគ្នាឈានឡើងទៅកាន់វគ្គពាក់កណ្តាលផ្តាច់ព្រ័ត្រនៃព្រឹត្តិការណ៍បាល់ទាត់ជើងឯកពិភពលោក ៤ឆ្នាំម្តងនេះ។

នៅវេលម៉ោង ១០យប់ ក្រុមជម្រើសជាតិសាំបាប្រេស៊ីល ជើងឯក ៥សម័យកាលដែលបានទម្លាក់ក្រុមជម្រើសជាតិកូរ៉េខាងត្បូង នឹងត្រូវជួបជាមួយក្រុមជើងឯករងឆ្នាំ ២០១៨ ក្រូអាត ដែលបានទម្លាក់ក្រុមជម្រើសជាតិជប៉ុននៅវគ្គប៉េណាល់ទីកាត់សេចក្តី។ ការប្រកួតនេះនឹងត្រូវធ្វើឡើងនៅកីឡដ្ឋាន Education City។

ដោយឡែក ការប្រកួតមួយគូទៀតនឹងធ្វើឡើងនៅវេលាម៉ោង ២ទាបភ្លឺនៅកីឡដ្ឋាន Lusail Stadium ដែលនឹងជាកីឡដ្ឋានទទួលស្វាគមន៍វគ្គផ្តាច់ព្រ័ត្រ FIFA World Cup ២០២២។ ក្រុមជម្រើសជាតិហូឡង់ ដែលទម្លាក់សហរដ្ឋអាមេរិក នឹងត្រូវទូទាត់បញ្ជីចាស់ជាមួយក្រុមជម្រើសជាតិអាហ្សង់ទីនដែលទម្លាក់អូស្ត្រាលី នៅវគ្គ ១៦ក្រុមចុងក្រោយ។

រវាងក្រុមជម្រើសជាតិហូឡង់ និងអាហ្សង់ទីន ក្រុមដែលឈ្នះ នឹងត្រូវប៉ះក្រុមមួយក្នុងចំណោម ក្រូអាត និង ប្រេស៊ីល នៅវគ្គពាក់កណ្តាលផ្តាច់ព្រ័ត្រ។

ចាំមើលការប្រកួតយប់នេះ ក្រុមណានឹងឡើងទៅវគ្គពាក់កណ្តាលផ្តាច់ព្រ័ត្រ??